Kung usa ka sa mga gikapoy na ug tuon aron makat-on pa ug dugang sa mga importanteng butang sa kinabuhi, para ni nimo. Padayon ug basa.
Usa ka butang nga dili nako makalimutan nga gisulti sa akong instructor sa kolehiyo…
“Wala natapos ang inyong pagtuon ug pagkat-on sa upat ka sulok sa eskwelahan kundi diri gasugod. Mao ni ang sinugdanan. Ayaw ninyo hunahunaa “graduate” namo, kinahanglan ra gihapon mo mopadayon ug paningkamot nga makat-on. Ang inyong kalambuan nakadepende sa inyong kanunay nga pagtuon, pag-aplikar, ug pagkat-on gikan sa inyong sayop.”
Magtulo na katuig ni sa akong hunahuna pero wala pa gihapon nako makalimtan. Pero ang Physics, Calculus ug History, ambot na lang. Murag gidamgo ra. Haha… Peace be with you sa akong mga maestro ug maestro.
Kasagaran nato pagkahuman ug eskwela, makalimtan na dayon nato atong mga nakat-onan sa eskwelahan. Ilabina ug dili ra pud nato mapuslan. Samot na ug kasagaran kinopyahan ra kay puros bright ang tapad.
Kinsa may wala kapuya ug eskwela? Kanang momata ka ug sayo kay sayo moadto ug eskwelahan kay wala kay assignment sa Inglis o mangita ug photocopy kay naay exam alas dos sa hapon.
Dili ko kalimot sa akong maestro sa elementarya sa dihang magreklamo mi kay sige mi gipasulat kay nagkompyut ug grado si ma’am. Sugod buntag hangtod hapon gasulat. Ingnon dayon mi niya “Pagmaestra sa mo!” Sa usa ka bahin naay punto si ma’am.
Ato ng sugdan.
Rason#3 – Dili Kasaligan Ang Atong Iniskwelahan
Basin makapangutana ka nako, “Bai, dili na diay ko mopadayon ug eskwela?” Wala ko nagpasabot nga dili na ka mopadayon ug eskwela. Kay kung kaya nimo mag Ph. D., ngano gud dili buhaton?
Kung dili kay Master’s Degree na lang o labing menus Bachelor’s Degree. Basta naa lay ikagasto, eskwela jud. Oo, bai, bahala ug mangopya ra sa imong klasmeyt. Pero pagtuon pud uy. Malooy na lang ta.
Bisan pa ug dili nato susihon ang statistics, daghan kaayong nakahuman nga wala nakatrabaho. Nakadiindiin na ug pinangita ug trabaho.
Daghan sab gi-tangtang sa trabaho dili hinungdan kay nakasala o nagbinuang sa gitrabahoan kundi tungod sa bag-ong teknolohiya nato karun ilabina ang pagsikat sa internet.
Mentras batan-on pa ka o naa pay panahon nga magkat-on ug skills, eskwela jud.
Naa koy kaila nga kompyansa ra kaayo ba. Pag naay project sa eskwelahan dili siya mangunay ug himo. Ug naay project ilabina kinahanglan i-encode, lahi ang mag-encode. Sa dihang nadawat na siya ug trabaho, ang una niya nga buhaton mag-encode ug usa ka sales letter.
Dili jud ko kalimot sa iyang estorya niya sa akoa nga gipaningot daw siya ug dagko. Mura daw sya ug gikabuhi gaatubang sa usa ka palid sa papel nga iyahang i-encode.
Galibog siya ug aha siya magsugod. Naulaw daw siya kaayo adtong adlawa kay perteng katawa sa iyang mga kauban sa opisina.
Kung hangtod karun gatinagsa ra gihapon ka ug type sa keyboard, bai, ayaw hulata nga mabuntagan ka sa imong trabaho ilabina ug gatapun-og imong kinahanglan i-encode.
Kung naa kay bakante ayaw lang jud sige ug scroll sa Facebook. Pwede ka magtuon ug “touch typing.” Bisan lang ug 15 minutos kada-adlaw. Dako na kaayo na ug ikatabang sa imong trabaho. Pwede ka magdownload ug “Typing Master®”. Libre ra na sya.
Rason #2 Daghan Kang Makat-onan Nga Mga Skills Nga Dako og Ikatabang sa Imong Trabaho ug sa Kinabuhi
Sauna taas kaayo ko ug linantawan sa mga nakahuman ug eskwela, karun nga nahuman nako ug eskwela pareha ra diay. Daghan kaayo nakahuman ug eskwela pero walay nakat-onan nga practical skills. Lupigon ra ug elementary graduate.
Naa koy kaila nga engineer sauna nga didto siya magpatudlo sa akong uyuan nga elementary graduate. Nakasag-ulo siya sa tanang pisa sa makina ug kabalo siya mo-layout ug magdebuho (drawing) pero dili siya kabalo moayo.
Mao nga importante jud naa kay kasinatian. Sa usa ka bahin dako sad ikatabang ng naa kay kahibalo pero pag dili na nimo ubanan ug buhat, pareha ra na sa wala ka kabalo.
Mentras ni kita ka sa imong trabaho, tuon pud. Hinayhinay ra gud. Naa mi goal magkabarkada nga dapat naa mi “One Proficiency Goal” kada tuig.
Pwede ka magtuon ug piano o gitara. Pwede sab ka mag-swimming lesson kung hangtod karun dili pa ka kabalo molangoy.
Pwede sab ka magtuon ug bag-ong pinulungan (language learning). Nindot kaayo nga maglaag ka abroad nga magkasinabot mo sa taga didto. Daghan ka nga mahimong higala nga wala nimo nabuhat kanhi.
Sama pananglit nangita ka ug trabaho, naa kay nakit-an nga trabaho nga dako-dako ug sweldo ug dako sad ug oportunidad nga molambo ka sa maong trabaho pero kinahanglan naa kay kahibalo sa Microsoft Excel. Pananglit bai, wala kay kahibalo sa Microsoft Excel, posible nga dili ka mosulay ug aplay ug trabaho. Maghunahuna na lang ka nga maggasto-gasto ra ka kung mosulay ka ug aplay ug wala kay tsansa nga madawat sa maong posisyon.
Pero kung nakakuha ka ug klase sa Excel, siyempre taas ka ug kompyansa sa imong kaugalingon nga kwalipayd ka sa maong posisyon. Di ba?
Kung mangutana ka nako bai kung unsa akong proficiency goal aning tuiga. Mao ni siya magblogging ka.
Bisan ug usa lang ka tawo nga molambo ang iyang kinabuhi pinaagi sa Bisaya Hub, dako na kaayo na para sa akoa.
Rason #1 – Daghan ka Ug Opsyon sa Trabaho ug Sa Kinabuhi
Kung dili lang jud ka mohunong og kat-on ug lambo, modaghan ang imong opsyon ug makapamili ka ug oportunidad. Mao nay ingon nila nga ikaw ang duolon sa oportunidad. Ang oportunidad na mo’y manuktok nimo.
Dili ko kalimot sa nagmentor nako sauna sa Laguna. All-around siya. Kabalo siya ug Carpentry, Masonry, Electrical Wiring, Plumbing, Waterproofing ug Uban pa nga skills nga kinahanglan sa balay. Paspas ug Pulido siya motrabaho. Mao ni iyang tubag sa akoa sa dihang nangutana ko niya nganong daghan kaayo siya ug skills.
“Kung usa ra ka buok imong nahibaw-an dili ka dali makakita ug trabaho. Kinahanglan daghan ka ug skills ug padayon nga magkat-on. Dili magsalig sa imong naagian ug nabuhat sa gahapon. Hunahunaa sige nga karun pa lang ka nagsugod bisan ug daghan na ka ug nahimo.”
Mangutana ka nako, “Bai, unya aha ug kanus-a man ko magsugod?”
Walay husto nga lugar ug panahon aron mopadayon ka magtuon ug magkat-on kundi KARUN.
Kulang atong kinabuhi aron mahibaw-an nato tanan. Magdesisyon ka kung unsa nga skills o kahibalo nga kinahanglan nimong tun-an aron magmauswagon ang imong kinabuhi ug diha ka magsugod.
Pwede ka magbasa ug libro, moeskwela, o magtuon pinaagi sa pagtan-aw ug bidyu (uso karun) sa Youtube. Tuon taman sa makaya basta makatabang lang nga mapalambo nimo ang imong kinabuhi nga walay masakitan o ma-agrabyado nga tawo ug makahatag og kalipay ug katagbawan.
Kung naa kay nakat-onan, palihog ko ug share sa imong mga higala.
Daghang salamat.
Comments
Post a Comment