Sa una nga article ang atong gihisgutan “continuos learning”.
Nahisgutan nako sa katapusan nga bahin sa article nga kulang ang atong kinabuhi aron makat-onan nato tanang butang nga naa sa ilalom sa adlaw. Ang ato lang mahimo mamili ug butang o kahibalo nga gusto nato makat-onan.
Kung gusto ka nga makalahutay ka sa imong pagpadayon sa pagtuon ug pagkat-on, kani nga post para nimo.
Kung naay gahum nga mahimo kang mas MALIPAYON, mas POSITIBO, mas LAGSIK ug mas KUGIHAN, magka-interes kaha ka bai?
Kung sultihan ta ka nga kaning gahuma libre ra ug kinahanglan lang gamay nga paghago ug panahon, mangayo kaha ka?
Nasayod ko nga kasagaran sa atong tubag, gusto ta naa tay ing-ana nga gahum. Tama ba?
Daghan kaayong mga butang sa atong palibot nga makahatag nato ug kaguol, ka negatibo, kaluya ug katapol. Di ba bai?
Usahay bation ta ug kalaay sa kinabuhi. Usahay makapangutana ta sa atong kinabuhi nganong ing-ani man sige ni? Maypa sila hayahay pa kaayo sila ug kahimtang? Ako tawon mura ug gidaogdaog sa kapalaran. (Unswa?)
Nganong luya man ko kaayo sila dasig man kaayo kada adlaw? Unsa diay lingaw ani nila?
Naa kay gusto buhaton, pero makatapol, maypa sila kay kugihan pa kaayo?
Bai, kung gibati ka aning mga butanga, padayon ug basa.
Karun bai sultihi na gud ko anang gahuma. Unsa man jud diay na?
Walay lain kaning gahuma gitawag ni siya ug GRATITUDE (gra-ti-tsud). Sa Binisaya gitawag kini ug Pagkamapasalamaton.
Unsa diay naa anang GRATITUDE bai? Nganong gamhanan man na?
Dako ug ikatabang ang GRATITUDE sa atong kinabuhi. Kung puno ta pasalamat sa mga butang nga naabot sa atong kinabuhi, mahimo tang mas malipayon ug mas positibo.
Bisan GRATITUDE lang na bai, daghan kaayo na ug benepisyo sa atong kinabuhi. Ang nakanindot kay dili naka kinahanglan mo-gasto ug taas nga panahon ug ilabina salapi o kwarta.
Mao ni ang 3 ka sekretong benepisyo sa pagkamapasalamaton sa atong adlaw-adlaw nga kinabuhi:
#1 Atong Madani Ang Mga Butang Nga Gusto Nato sa Kinabuhi
Kung makapokus ta sa mga panalangin nga gihatag sa Ginoo nato matag adlaw ug mapasalamat kita niini, madani nato ang nagkadaiyang mga butang nga gusto nato sa kinabuhi ug ang atong hunahuna ug pagbati nakatumong sa mga butang nga gusto nato mahitabo sa kinabuhi.
Magkahinayhinay ug kawala ang mga butang nga dili nato gusto kay wala na nato natagaan ug attensyon.
Ako mitoo ko anang Law of Attraction, kung unsa atong gihunahuna sige, mao sad nay balik-balik mahitabo sa atong kinabuhi.
#2 Makatabang ug Paglambo sa Atong Relasyon sa Ubang Tawo
Kung kabalo lang bitaw ta tanan mopasalamat sa mga tawo nga nakatabang nato bisan sa gamay nga paagi, malinawon ang komunidad.
Adtong bata pa ta gitudloan ta nga paghatagan kinahanglan kabalo mopasalamat tungod kay usa ka na ka maayong pamatasan.
Bisan ug leksyon na sa bata, dako kaayo siya ug benepisyo. Kung nakamatikod ka, mas ganahan ka makigkauban sa mga tawo nga mapasalamaton kaysa mga reklamador. Di ba?
Kinahanglan kabalo ka magpasalamat sa mga tawo nga nakatabang nimo sa ilahang kontribusyon, aksyon ug abilidad.
#3 Tambal sa Sakit sa Pagkareklamador ug Pagkanegatibo
Usa ka pamaagi nga mabakwi nato ang hunahuna ug pagbati gikan sa pagkareklamador ug pagkanegatibo, ihapa ang tanang panalangin nga imong nadawat sugod sa imong pagmata ug hangtod karung taknaa nga nagbasa ka niini.
Sugod sa oportunidad nga nakamata pa ka ug hangtod sa pagkaon nga imong gikaon ug hangtod sa imong gibasa karun. Di ba daghan kaayo?
Kung nasayod ta sa atong mga panalangin nga nadawat kada adlaw, walay rason nga magreklamo pa ta o mahimong negatibo.
Wala sad ko kadungog ug mapasalamaton nga tawo nga reklamador ug negatibo ug wala sad ko kadungog ug naay tawo nga reklamador ug negatibo nga mapasalamaton.
Niining taknaa, makaingon ka nindot man diay ng GRATITUDE bai. Unya unsaon man nako nga mahimo kong mapasalamaton?
Sayon ra sya kaayo bai.
Sige magpractice ta.
1. Gama ka ug listahan og lima ka butang nga angay nimong pasalamatan niining taknaa. Pwede dagkong butang (sama sa imong pamilya o higala) o gagmayng butang (sama sa nag-abre nimo ug portahan ganihang buntag). Mas maayo imo siyang ilista para dili makalimtan. Dayon, buhata na karun dayon.
2. Imong basahon imong gilista ug kinahanglan mabati nimo kini. Importante ang pagbati niining bahina. Kay kung dili siya nimo mabati, sama ra ka sa nagtan-aw ug Chinese Movie nga walay subtitle.
3. Kung naa may tawo nga kinahanglan nimong pasalamatan. Pwede nimo sila tawagan o teksan o chat-tan.
Pwede nimo ni siya kanunay buhaton matag-adlaw hangtod nga mosurop kini sa imong pagkatawo ug mahimo na kining habit.
Akoang Sugilanon
Katapusang bulan sa 2016, nagbasa ko ug libro nga sinulat ni Napoleon Hill ang “Law of Success.” Naay chapter didto nga ang gihisgutan GRATITUDE.
Didto ko nadasig nga akong sulayan. Unang semana, murag wala ray nahitabo. Naabot ang usa bulan nakamatikod nako nga dili na kaayo ko magbagolbol.
Sa tinoud lang bai, nagdako ko sa lugar nga ang akong mga silingan ug barkada bagolbolan ug naay pagkanegatibo. Kaduha nako ni gibuhat kada adlaw, pagmata nako sa buntag ug bag-o ko matulog.
Nadugay nahimo na nakong habit. Sukad nga nakat-onan nako ning butanga, dako na kaayo ug kausaban akong kinabuhi. Simple ra kaayo tawon siya nga butang pero dako ug ikatabang.
Ang kausaban nagsugod sa atong sulod.
Daghang salamat sa pagbasa ug ayaw kalimot ug share niini sa imong mga higala.
Comments
Post a Comment