Niaging gabii, nadugay-dugay ko ug tulog kay 3 ka higala nako naay problema sa ilang mga hinigugma. Kani bang gugma ba.
Nganong pangitaon man gyud ni nga masakitan ra man sad ta. Hahaha.
Ambot og nganong dalangpanan man gyud ko aning gugma-gugma na’y hisgutan.
Nganong wala man ko pahibal-a adtong nagka-uyab pa sila ug tam-is pa ilang paghinigugmaay.
Tungod kay higala man wala sad ta’y mahimo kundi maminaw ug motambag ug ginagmay.
Sa 5 na nako ka-tuig ug tinambag sa akong mga higala ug mga tawong ninglabay sa atong kinabuhi, daghan-daghan na sad ko ug nakat-onan. Bisan ug ilaha man ‘tong panghitabo sa kinabuhi pero nakat-on sad ko ug daghan.
Pasalamat lang gyud ko ug dako adtong akong apuhan nga nagtudlo nako ani.
Ana siya sa akoa, apo, klase-klase man nga tawo nga moabot sa imong kinabuhi, ang uban mahimo nimong higala sa hangtod, ang uban tudloan ka ug bililhong pagtulon-an sa kinabuhi ug ang uban murag wala ra’y buhaton sa imong kinabuhi pero ang ilang presensya dako ug ikatabang sa imong kinabuhi. Isipa silang tanan nga gasa (gift) ug isipa sila nga imong magtutudlo (teacher). Kung imo nga buhaton, dili naka mogasto ug daghang sapi ug panahon daghan pa ka ug makat-onan nga praktikal nga magamit nimo sa imong inadlaw nga pagkinabuhi.
Mao ni ang tulo ka rason nganong atong isipon ang tanang tawo nga moabot sa atong kinabuhi nga magtutudlo:
#1 Makat-on Ka Gikan sa Kasinatian Sa Uban
Dili ra ta karun gipanganak mao nga matag-usa nato nga naa nay kasinatian sa mga butang niining kalibutana.
Mao ng ayaw gyud hukom dayon nga ing-ana ra na sila. Tanang tawo nga miabot sa atong kinabuhi dili na siya aksidente. Naa’y rason nganong naabot na sila sa atong kinabuhi.
Sa dihang garbo nimo ang mangibabaw, mao na’y adlaw nga mohunong ka ug kat-on. Maminaw ka para dili lang nga mahibalo ka o mo-argyu ka sa ilahang gisulti kun dili para nga makasabot ka sa ilang gusto ipaabot nimo ug unsay rason nganong gisuginlan ka nila.
Hunyo 2005, nanglangyaw mi sa usa ka suok-suok nga komunidad. Ana dayon ko sa akong kaugalingon, hangina kaayo ning mga tawhana diri uy. Hambug man kaayo. Sa dihang nakasabot nako sa lugar ug sa ilang mga batasan, ing-ana ra gyud diay na sila’g tonada ug magdeliver og estorya. Usa ka butang nga nakat-on nako didto, dili gyud diay ka pwede mo-prejudge sa laing tawo.
#2 Makat-on Ka Gikan Sa Ilang Mga Sayop
Kasagaran kaayo sa mga tawo sa atong palibot kung naa gani tay maayong mabuhat, daghan kaayo pangutana, di ba bai? Sayop ra nimo ang ilang gibantayan. Pagmasayop na gani ka, wala nay daghang pangutana, mokonklusyon dayon sila nga ing-ana ra ka.
Kani opinyon ra ni nako, bisan man ug sayop sa uban ng akong nakita, ako ng giisip leksyon na sa akong kinabuhi pero sa laing tawo lang nahitabo. Di ba naa’y DILI buhaton ug DAPAT buhaton? Mas magpasalamat noun ka nga wala sa imoha nahitabo mao ng iampo na lang nimo sila kaysa naa pa kay daghang sugilanon nga magama.
Dili man gyud ta perpekto, sige man gyud ta kasapoy ilabina kung naa ta’y bag-ong gibuhat. Diri man sad ta motubo sa kinabuhi. Bag-o ta mohukom sa uban, ato sa’ng pamalandungan ba kung unsa’y mensahe nga buot ipaabot sa Ginoo sa atoa.
Usahay sad gamiton sa Ginoo ang ubang tawo nga masayop para makaila ta sa atong kaugalingon. Sukad nga nakat-on nako aning bulawanong prinsipyo dili na kaayo dali-dali ug hukom sa uban sumala sa akong nakita.
#3 Dako Ug Ikatabang Nga Paspas Ang Imong Pag-uswag sa Kinabuhi
Kung gusto ka mahimong magmalampuson nga tawo, ayaw paminaw sa mga tawo nga miingon sa imoha nga dili nimo kaya. Kay kung maminaw ka nila nan daghan namo. Kung mahimo mangita ka ug tawo nga hamugaway o nagmalampuson na ang kinabuhi dayon suhira kung unsay ilang gibuhat nganong nihamugaway sila.
Tungod sa ka high tech sa atong panahon, pwede na sad ka makapangita ug tawo o magresearch ba ug materyales nga para makat-on ka. Sama pananglit gusto ka mahibalo unsaon paggama ug keyk, kung naa kay nailhan o kaila nga duol sa imong gipuy-an pwede nimo to sya amigohon ug magpatudlo ka niya. Kung wala pwede ka mangita ug video sa youtube o magbasa ug blog unsaon paggama ug keyk sumala sa imong gusto. Dili naka kinahanglan magdiskobre pa unsaon nimo paggama ug keyk.
Akong Sugilanon
Layo ra kaayo sa akong kurso ning pagama ug login system sa negosyo pero nanginahanglan ko. Wala sad ko’y kaila diri sa duol.
Naa ko’y kaila sa laing lugar pero wala sad ko’y kwarta nga ibayad sa pagpabuhat. Dayon, ilabina login system kinahanglan man gyud na ug lig-on nga seguridad para dili ma-abuso sa ubang tawo ang data sa magamit (user).
Karun, para mas masabtan nako siya, nagtuon ko sa internet. Akong gitun-an sugod sa basic hangtod nagka-advance ang akong kahibalo. Dako kaayo ikatabang ang ubang tawo nga para paspas ang imong progress. Sa sulod sa 14 ka adlaw nagama na sya nako nga akong gasto bayad ra sa data sa internet. Dayon nadugangan pa akong kahibalo.
Konklusyon
Daghang mga butang nga kinahanglan ang atong isigkatawo para nga makat-on ta. Kung atong isipon nga ang tanang tawo nga moabot sa atong kinabuhi nga magtutudlo o gasa, paspas ang pag-uswag sa atong kinabuhi.
Una, makat-on ta sa ilang kasinatian. Maka-advice sila sa imoha kung unsa’y kinahanglan nimong buhaton ug mga dili nimo dapat buhaton. Kung atong lang abrehan ang atong salabutan ug ang atong kasingkasing, daghan ta ug makat-onan ug makatabang sad nga mahimong magmalampuson ang atong kinabuhi.
Ikaduha, dili na nato mautro ang sayop sa kaniadto ug sayop sa laing tawo. Pinaagi sa ilang mga sayop didto sad ta makat-on kung unsay angay natong buhaton para dili mahitabo sa atong kinabuhi. Ang pinakanindot nga pamaagi, ato na lang silang iampo sa Ginoo kaysa ato silang hukman o i-tsismis sa uban.
Ikatulo, Magamit nato ang kasinatian ug sayop sa laing tawo para paspas tang molambo sa kinabuhi. Pasalamat ka sa laing tawo nga sila’y nagbuhat ug dalan para sa imong pag-asenso. Basta wala lang ka’y ma-agrabyado nga laing tawo sa imohang gibuhat ug dili lang batok sa balaod, walay rason nga dili nimo ipadayon para moabot ang imong gipangandoy nga kalampusan.
Kung nakatabang ni nga post, palihog ko ug share sa imong mga higala.
Daghang salamat.
Comments
Post a Comment